भारत आणि बांग्लादेशच्या लष्कराचा ‘संप्रीती’ लष्करी सराव बांग्लादेशमध्ये जेशोर इथं सुरु

 

नवी दिल्ली (वृत्तसंस्था) : भारत आणि बांग्लादेशच्या लष्कराचा ‘संप्रीती’ हा संयुक्त लष्करी सराव काल बांग्लादेशमध्ये जेशोर इथं सुरु झाला. ५ ते १६ जून दरम्यान होणाऱ्या या सरावाची ही १० वी आवृत्ती आहे. दहशतवाद आणि घुसखोरीचा सामना, मानवतावादी सहाय्य आणि आपत्ती निवारण कार्य एकत्रितपणे करणं हे या संयुक्त सरावाचं उद्दिष्ट आहे. बांगलादेशचे जेसोर विभागाचे प्रमुख मेजर जनरल मोहोम्मद नुरुल अन्वर यांनी या सरावाचं उदघाटन केलं. या संयुक्त लष्करी सरावामध्ये भारतीय लष्कराचं नेतृत्त्व ब्रिगेडिर जनरल रुपेश शेहगल करणार आहेत. भारत आणि बांग्लादेश २०१० सालापासून संयुक्त लष्करी सराव आयोजित करत असून दोन्ही देशांमधले द्विपक्षीय संबंध सुधारण्याच्या दृष्टीनं तो महत्वाचा आहे.