कोविड-19 च्या लसीकरणाचा वेग मोठ्या प्रमाणात वाढवा - केंद्र सरकारची राज्यांना सूचना

 

नवी दिल्ली (वृत्तसंस्था) : कोविड-19 च्या लसीकरणाचा वेग मोठ्या प्रमाणात वाढवावा असं केंद्र सरकारनं राज्य आणि केंद्रशासित प्रदेशांना सांगितलं आहे. केंद्रीय आरोग्य सचिव राजेश भूषण यांनी काल राज्यांचे आरोग्य सचिव आणि राष्ट्रीय आरोग्य अभियानाच्या व्यवस्थापकीय संचालकांसमवेत लसीकरणाबाबत दूरदृश्य प्रणालीद्वारे आढावा बैठक घेतली, त्या बैठकीत  ही सूचना करण्यात आली.

प्रत्येक लसीकरण सत्रात सध्याच्या सरासरी संख्येपेक्षा अधिक व्यक्तींना लस देण्यास पुष्कळ वाव असल्याचं राजेश भूषण  यांनी यावेळी सांगितलं.  लसीकरण झालेल्या व्यक्तींच्या दरदिवसाच्या सरासरी संख्येचं विश्र्लेषण करून त्या संख्येत वाढ करण्याच्या दृष्टीनं आवश्यक पावलं उचलावीत अशी सूचनाही या बैठकीत राज्याच्या आरोग्य सचिवांना करण्यात आली.