छायाचित्र प्रदर्शनाला मुख्यमंत्र्यांची भेट

 

मुंबई (वृत्तसंस्था) : मुंबई विद्यापीठातल्या सर कावसजी सभागृहात आयोजित शिवसेनाप्रमुख बाळासाहेब ठाकरे यांच्या जीवनावरील छायाचित्र प्रदर्शनाला काल मुख्यमंत्री उद्धव ठाकरे यांनी भेट दिली. बाळासाहेबांना नवं काही तंत्रज्ञान आलं की, त्याविषयी उत्सुकता असायची आणि माझ्याकडून ते जाणून घ्यायचे, असे सांगून मुख्यमंत्री म्हणाले की, छायाचित्रण हे गेलेला क्षण पुन्हा जिवंत करून आपल्यासमोर आणतं.

ही जुनी छायाचित्रं पाहिल्यानंतर बाळासाहेबांच्या बरोबरचे ते दिवस आणि तो कालखंड आठवला. बाळासाहेबांच्या नियोजित स्मारकातदेखील जुनी चांगली छायाचित्रे लावायची आहेत. खूप प्रयत्नानंतर बाळासाहेबांच्या व्यंगचित्रांचं संकलन असलेलं फटकारे पुस्तक प्रकाशित करता आलं, याचं मला खूप समाधान आहे, असंही ते म्हणाले.

मुंबई विद्यापीठाचं श्रीमान बाळासाहेब ठाकरे अध्यासन केंद्र, सार्थ प्रतिष्ठान आणि मुंबई न्यूज फोटोग्राफर असोसिएशन यांच्या वतीनं हे प्रदर्शन आयोजित करण्यात आलं आहे.